Apréndese a desistir de tanta cousa,
da noite sobre todo que sobrenada
no sono que rouba o tempo e mana
desacougos fondos coma pozos.
Apréndese a dispensar o café, os soños,
a madrugada sen dores e sen flores,
os bicos e as apertas, os ollos no silencio,
as mans e os horizontes. Apréndese.
Apréndese a reptar pola terra
dobrando a carne e a rabia,
a enterrar os mañás antes da hora,
a comer sen sal e sen compaña.
Apréndese a non agradecer ao ceo
o infinito que se foi deixando ás costas,
a artrite e a brancura nos cabelos,
os amigos, as engurras e os iogures.
Sem comentários:
Enviar um comentário